గీటురాయి మూడు దశాబ్దాల ప్రయాణాన్ని కొనసాగిస్తుంది. చరిత్ర గతి కొత్తపుంతలు తొక్కడానికి వైజ్ఞానిక, సాంకేతిక శాస్త్రాలు కాలంతో పాటు కదం తొక్కుతూ కొత్త శిఖరాలు అందుకోడానికి ఈ కాల వ్యవధి చాలు.
పరిమిత వనరులు, సాధారణ సాధనా సంపత్తి ఉన్న గీటురాయి లాంటి మామూలు పత్రిక మూడు దశాబ్దాల పాటు ఒడిదుడుకులను తట్టుకొని నిలకడగా అడుగులు ముందుకు వేయడమంటే కాలప్రవాహానికి ఎదురీదడమే. ఈ ఎదురీతలో గీటురాయి అలుపెరుగక పురోగమిస్తుందంటే కారణం – అసాధారణ సైద్ధాంతిక బలం, కర్తవ్యదీక్ష, విలువల పట్ల అంకితభావం, పాఠకుల అసమాన అభిమానాలే. ఈ బలంతోనే గీటురాయి కాల ప్రవాహానికి ఎదురీదుతూ – సమకాలీన పత్రికా జగతిలో మిరుమిట్లు గొరిపే రంగుల హరివిల్లుల  మధ్య స్వచ్ఛమైన తెల్లని మేఘంలా ముందుకు సాగుతుంది.
సమాజానికి వ్యక్తులే పునాది రాళ్ళు. వ్యక్తులు సౌశీలవంతులు కానంతవరకు, వారి భావాలు, విలువలు ఉన్నత సిద్ధాంతాలతో ప్రభావితం కానంతవరకు సంక్షోభిత సమాజానికి చల్లటి వీచికలు ప్రాప్తంకావు. ఎలాంటి వ్యక్తులో, అలాంటి సమాజమే, ఎలాంటి సమాజమో అలాంటి ప్రభుత్వమే ప్రాప్తిస్తాయి. అందువల్ల సమాజంలో విలువలను, ప్రమాణాలను, సచ్ఛీలాన్ని, దైవభక్తి, దైవభీతిని సృజించడానికి ప్రారంభం నుంచి గీటురాయి చేస్తున్న ప్రయత్నాలు పలువురి ప్రశంసలు పొందాయి. మత సామరస్యానికి, అపోహలు, అపార్థాలు దూరం చేయడానికి, ఇస్లామీయ జీవన వ్యవస్థను ప్రజలకు పరిచయం చేయడానికి గీటురాయి చేస్తున్న కృషిని అనేకులు మెచ్చుకున్నారు. ఈ ప్రశంసలు మెప్పులే గీటురాయికి కొండంత బలం.
ప్రజాస్వామ్య, శాంతియుత, చట్టబద్ధమైన విధానాల ద్వారానే ప్రజలు తమ లక్ష్య సాధనకు కృషిచేయాలని గీటురాయి సదా కోరుకొంది. అన్ని వర్గాలు కలసికట్టుగా సమస్యల పరిష్కారానికి ప్రయత్నించాలని అభిలషించింది. అందుకు అవసరమైన వాతావరణాన్ని ఏర్పరచడానికి వివిధ వర్గాల మధ్య సదవగాహన, సహజీవన భావనలు పెంపొందించడానికి కృషిచేస్తోంది. దైవభక్తి, పరలోక భీతి ఆధారంగా మాత్రమే మనిషి సదాచార సంపన్నునిగా, పరోపకారిగా రూపుదిద్దు కొంటాడన్నది గీటురాయి నమ్మకం. ఆ దిశగా గీటురాయి ప్రజలను ప్రోత్సహిస్తోంది. గత మూడు దశాబ్దాలుగా గీటురాయి ఈ విధి బాధ్యతలనే నిర్వహిస్తూ వస్తోంది. మున్ముందు కూడా ఈ విధి బాధ్యతలనే నిర్వహిస్తుంది.
ఇది తేలికైన పని కాదు. నీతికి, భక్తికి, భీతికి చోటులేని కేవలం భౌతికవాదం రీతి రాజ్యం చేస్తున్నప్పడు ఆ గాలివాటానికి పెద్ద పెద్ద వృక్షాలే మూలాలకు తిలోదకాలిచ్చి మిధ్యాజగత్తులో ఎగురుతున్నప్పుడు ఆ ప్రవాహాన్ని తట్టుకొని, మౌలిక సూత్రలకు, మూలాలకు అంటి పెట్టుకొని కాల ప్రవాహానికి ఎదురీదడం మున్నందు కొనసాగుతుంది. ఈ సందర్భంగా పాఠకుల ఆదరాభిమానాల ప్రోత్సాహం పుష్కలంగా లభిస్తుందని గీటురాయి ఆశిస్తోంది.